O martes 26 de Marzo, tivo comenzo na Facultade de Ciencias Empresariais e Turismo do campus de Ourense a celebración da súa IX International Week 2019, cita que permite a alumnado e profesorado do centro compartir unha semana de actividades formativas e lúdicas con profesorado procedente de diversas universidades europeas e suramericanas e alumnado procedente da Universidade xermana de Bremerhaven.

A cita inicióu a súa programación contando coa participación de arredor de 80 estudantes de Ciencias Empresariais e Turismo, 15 estudantes da Universidade de Bremerhaven e unha vintena de profesores e profesoras de Portugal, Francia, Croacia, Alemaña, Brasil e Hungría. 

Esther de Blas, vicerreitora do campus de Ourense, foi a encargada de darlles a benvida, xunto a Elena Rivo e Elena de Prada, responsable de Internacionalización da facultade organizadora, manifestando o seu desexo de que profesorado e alumnado visitante aproveite a súa estadía en Ourense non só para o enriquecemento académico senón tamén para o cultural e deportivo.

Na primeira xornada de actividade, a nosa alumna Andrea Estévez recibiu o seu certificado como primeira en acatar o título de dobre grao en Administración e Dirección de Empresas por ambas Universidades, de Vigo e Bremerhaven. 

Gerhard Feldmeier, vicerreitor da Universidade de Bremerhaven, foi o encargado de facer entrega á egresada ourensá da certificación oficial da súa institución académica, que se suma á que xa tiña da Universidade de Vigo e que pecha a consecución do dobre grao. 

María Isabel Doval, vicerreitora de Responsabilidade Social, Internacionalización e Cooperación da Universidade de Vigo foi a encargada de felicitar, en nome proprio e do reitor, Manuel Reigosa, á egresada e aos responsables académicos polo éxito desta iniciativa e deu a benvida ao alumnado e profesorado estranxeiro presente na IX International Week.  

Pola súa banda, Elena Rivo, decana da Facultade de Ciencias Empresariais e Turismo, amosou a súa satisfacción por pechar os seus seis anos de mandato á fronte deste centro con este acto. Rivo subliñou “como para chegar aquí houbo moito traballo detrás do equipo”, explicando como “foi necesario dar docencia en inglés, elaborar un proxecto de internacionalización e chegar a acordos con dúas estruturas administrativas diferentes”.

A Facultade de Ciencias Empresariais e Turismo do campus de Ourense celebrou este martes 18 do 12 de 2018, unha nova xornada da súa iniciativa Hostalaría e sociedade. Despois da participación o pasado curso de Daniel Guzmán e Julio Sotomayor, do restaurante Nova, e de Aser Álvarez, de Casa Galeguesa, nesta ocasión os convidados foron Francisco Domínguez, propietario do Café Pacífico, e o seu cociñeiro Noel Fernández. Ambos falaron da súa experiencia de transformación dun negocio hostaleiro familiar.

Según explicou Javier Sánchez, vicedecano da Facultade de Ciencias Empresariais e Turismo, a xornada estivo especialmente organizada pensando no alumnado do Grao en Turismo, que conta con materias nas que se aborda a xestión da restauración, a xestión de destinos de interior e a planificación e xestión de espazos turísticos. 

Ao longo da súa intervención Francisco Domínguez explicou as orixes, a historia e a evolución do negocio familiar Café Pacífico desde a súa creación ata chegar á actualidade. De pasar de ser “un café clásico” pasou a ter unha oferta baseada nos almorzos, no menú degustación ao mediodía e de brunch as fins de semana.

Ante o cambio de modelo de negocio e gastronómico apuntou como “a resposta da xente está sendo moi boa” pero fixo fincapé en como, ao tratarse “dun proxecto tan persoal haberá que agardar arredor de tres anos para ver se efectivamente o modelo é rendible”. Sobre como foi recibida esa evolución xa non externamente senón internamente, ao tratarse dun negocio de orixe familiar, comentou que foi ben recibida xa que “sempre se quere mellorar e todo o que sexa mellorar é benvido”.

Para coñecer a proposta gastronómica de Café Pacífico, ademais do seu modelo de negocio, o alumnado tivo a oportunidade de probar algunhas das elaboracións que ofrecen nel e dar a súa opinión ao respecto.  

A Facultade de Ciencias Empresariais e Turismo do campus de Ourense acolleu este mércores 28 do 11 de 2018, unha nova edición da xornada de orientación laboral que cada curso académico organiza xunto ao Colexio de Economistas de Ourense. Tres profesionais do sector compartiron mesa e diálogo con alumnado do centro co obxectivo de axudarlles a obter unha visión realista do mercado laboral.

A xornada, que cada ano se celebra co lema Os estudos de Administración e Dirección de Empresas: unha titulación con moitas opcións, tivo como obxectivo amosar ao alumnado do grao de Administración e Dirección de Empresas e do dobre grao Dereito-ADE, especialmente aos dos últimos cursos, algunhas das saídas profesionais que terán cando rematen os seus estudos. A iniciativa, explicaron os seus responsables, xorde da estreita colaboración que existe entre a Facultade de Ciencias Empresariais e Turismo e o Colexio de Economistas de Ourense, colaboración destinada a contribuír a unha mellor formación e a unha maior inserción laboral do alumnado deste centro.

Nesta edición modificouse o formato de conferencia habitual por un café, formato más informal coa pretensión de que o diálogo, indicaron desde a súa organización, fose máis frutífero entre egresadas e alumnado.

Estiveron presentes Francisco Javier Sánchez Sellero, vicedecano da Facultade de Ciencias Empresariais e Turismo, e Guillermo Díez, decano-presidente do Colexio de Economistas de Ourense, o colexcio profesional convidou a tres profesionais tituladas en Administración e Dirección de Empresas para contar a súa traxectoria desde que remataron os seus estudos e as características do traballo que realizan na actualidade. Trátase de Luiba Yanara Rodríguez, que relatou a súa traxectoria profesional e o traballo que actualmente realiza en administración dunha empresa; Ainhoa Mateo López, que é traballadora por conta propia; e Eva Gloria Fernández, que exerce como economista. As tres detallaron para as e os asistentes como foi a súa busca de emprego unha vez rematada a carreira, os cambios de traballo vividos, as dificultades atopadas ou como ven elas actualmente o mercado laboral, facendo fincapé en detalles que puidesen ser de utilidade para o alumnado presente.  

A conferencia foi ofrecida o martes 25 do 9 de 2018 por Modesto Corderí, xefe do Departamento de Chino da Escola Oficial de Idiomas de Ourense. Nela amosou ás persoas asistentes como “os galegos somo os chineses de España”, afirmando como “temos moitas máis cousas en común que diferencias”. Entre esas cousas en común, o profesor apuntou cuestións como a orixe rural, a historia de emigración ou “como somos traballadores e aforradores coma eles”. Con humor tamén salientou como chinos e galegos tamén comparten “dicir as cousas de xeito indirecto e non definirnos para evitar o conflito”. En todo caso, durante a súa intervención o relator fixo fincapé en como “somos máis parecidos do que cremos en principio”.

Entre as diferencias a ter en conta á  hora de relacionarse empresarialmente con China, Modesto Corderí  salientou como “nós queremos facer todo moi rápido, eles non” e como “os contratos para nós teñen unha validez como se estivesen escritos en pedra e para eles é máis ben unha declaración de intencións, o que nos obriga a nós a ser máis flexibles”. En relación con isto apuntou tamén como “moitos tratos fanse en ceas e comidas e como hai unha xerarquía moi importante para eles que hai que respectar”. Tamén destacou entre as diferenzas como en China as e os estranxeiros son moi ben recibidos cando aquí “somos bastante pechados cos que veñen de fora”.

Ao longo da súa intervención, o relator fixo un achegamento ao xigante asiático desde diferentes perspectivas, amosando aos participantes desde como saudar en chinés ou coñecer o mapa deste país ata datos históricos de relevancia, como por exemplo como a apertura económica desta república popular chegou nos anos 70 de man de Deng Xiao Ping. A evolución tan grande vivida polo país desde entón pero en tan pouco tempo histórico, sinalou, fai que aínda “soemos ter unha imaxe moi antiga de China”. Como exemplo da rapidez desta evolución, o relator lembrou como cando el chegou a Beijing no ano 2006 había na cidade tres liñas de metro e como cando a deixo en 2016 era xa máis de 20.

A Facultade de Ciencias Empresariais e Turismo celebrou, o lúns 10 do 9 de 2018 a conferencia A percepción dos prezos dos productos e servicios, ofrecida por Jorge Pelegrín, profesor da Área de Comercialización e Investigación de Mercados da Universidad de La Rioja.

O acto extra-académico, coordinado polo profesor do centro José Antonio Fraiz, foi o primeiro aberto ao público interesado que se celebra no centro. Ante un público composto maioritariamente por profesorado aínda que tamén con presenza de alumnado, Jorge Pelegrín ofreceu unha sesión na que intentou amosar as claves que guían a determinación dos prezos por parte das empresas. 

“O vendedor sabe o que vende pero os compradores non teñen tan claro que é o que están a mercar”, explicou Jorge Pelegrín. Esa “asimetría de información”, apuntou, é a que permite ás empresas manipular os prezos para obter os beneficios necesarios, para ter a marxe de beneficios que buscan. Coa chegada de Internet e a posibilidade de que as e os consumidores comparen prezos e produtos, esta asimetría, sinalou o profesor, “diminuíu pero segue existindo”. A pesar de toda a información e valoracións dispoñibles na rede, lembrou, que a ou o comprador teña a percepción de que fixo “a mellor compra” segue a ser un reto tanto para consumidores como para empresas.

O concepto de prezo, recalcou na súa intervención ante o público asistente, “é complexo e multidimensional” e son diferentes os camiños existentes para “xogar” con el, para modificalo. O éxito das empresas que incluso en época de crise económica conseguen aumentar as súas vendas, apuntou Jorge Pelegrín, está en que “comprenden os prezos e coñecen a segmentación dos consumidores”, adaptándose aos seus segmentos e non intentando que os segmentos se adapta a eles. Así, lembrou, crise económica non é igual nin a caída das vendas nin a venda de produtos de baixo prezo.

A VII promoción do Grao en Turismo, formada por 47 estudantes, e a VIII promoción do Grao en Administración e Dirección de Empresas, formada por 46 estudantes, da Facultade de Ciencias Empresariais e Turismo do campus de Ourense celebraron o venres día 8 do 6 do 2018 o seu acto de graduación. Acompañándoos nun momento tan importante da súa traxectoria profesional e persoal estiveron non só familiares, amigos e membros da comunidade universitaria senón tamén numerosas autoridades.

O acto contou coa participación de Manuel Reigosa, reitor da Universidade de Vigo; Alberto Núñez Feijóo, presidente da Xunta de Galicia; Esther de Blas, vicerreitora do campus de Ourense, e Elena Rivo, decana da Facultade de Ciencias Empresariais e Turismo. Os padriños externos das promocións foron Amancio López, director xeral e conselleiro delegado do Grupo Hotusa, e Victor Casal, director de Banca de Empresas e Pemes de Abanca. 

O padriño académico foi o profesor do centro Alberto Vaquero. “Queridos alumnos e alumnas, tras catro anos de formación, quero lembrarvos que isto non é un punto e final da vosa vida formativa, senón unha etapa nunha viaxe que apenas comeza. O título acredítavos unha formación superior que podedes, e debedes, ir consolidando e ampliando ao longo da vosa vida profesional. A facultade sempre estará aberta para todo o que necesitedes”, díxolle Elena Rivo ás dúas novas promocións do centro. 

Desde o luns 9 de abril a Facultade de Ciencias Empresariais e Turismo do campus de Ourense celebrou a súa xa tradicional International Week, que permite ao seu alumnado compartir actividades académicas e lúdicas con estudantes e profesorado estranxeiro. Despois dun intenso programa académico e lúdico, a cita pechouse este venres coa entrega por parte da Universidade de Bremerhaven ao centro ourensán dunha bolsa para que un dos seus estudantes asista de balde á escola internacional de verán da institución académica alemá.

A cita máis internacional de Ciencias Empresariais e Turismo cumpriu este ano a súa oitava edición acadando a participación de 110 estudantes propios, 12 da Universidade de Bremerhaven e 15 docentes de diferentes países da Unión Europea. “A entrega desta bolsa é un broche de ouro para unha edición que consideramos que foi un éxito non só pola participación e pola calidade do programa desenvolvido senón sobre todo pola convivencia que se deu entre todos os participantes”, afirmou Elena Rivo, decana da Facultade de Ciencias Empresariais e Turismo.

A decana do centro foi a encargada de recibir o compromiso da bolsa de mans de Gerhard Feldmeier, vicerreitor da Universidade de Bremerhaven, nun acto que contou tamén coa participación de Elena de Prada, responsable de Internacionalización da facultade ourensá. Gerhard Feldmeier destacou como “é difícil dicir adeus” despois de compartir unha semana na que tiveron a oportunidade de “aprender uns de outros” e desenvolver un “gran programa de actividades” que lle permitiron ademais de afondar nas súas áreas de coñecemento “coñecer a cultura de Galicia, a súa historia e tamén a súa gastronomía”. Salientando como o campus de Ourense se “ten convertido na súa segunda casa” e agradecendo especialmente o trato dispensado polas persoas que traballan en Ciencias Empresariais e Turismo, Feldmeier subliñou como esta bolsa quere continuar a liña de estreitar as relacións entre a Universidade de Bremerhaven e a de Vigo.

A bolsa, valorada en case 2000 euros, permitirá a un estudante, elixido pola Facultade de Ciencias Empresariais e Turismo ourensá, ampliar os seus coñecementos e experiencias “na comunidade internacional” que se vive na escola de verán da universidade alemá, que se celebra durante unha quincena do mes de agosto e que conta coa participación de alumnado “de diferentes partes do mundo”. 

Esta iniciativa dá continuidade á colaboración que existe entre as dúas institución académicas que, alén da celebración da International Week, na actualidade ofrecen un grao internacional en Administración e Dirección de Empresas pola University of Applied Sciences Bremerhaven e pola Facultade de Ciencias Empresariais e Turismo da Universidade de Vigo, que permite a estudantes do centro ourensán realizar o último curso na Hochschule Bremerhaven e a estudantes alemáns facelo mesmo nas aulas ourensás.